شمائلہ اسلم
بیورو چیف پاکستان
ایس این این نیوز اردو
محکمہ داخلہ پنجاب نے پاکستان، سری لنکا اور زمبابوے کے درمیان ہونے والی سہ ملکی کرکٹ سیریز کے لیے فوج، رینجرز اور
ایوی ایشن اثاثے طلب کر لیے ہیں تاکہ فول پروف سکیورٹی فراہم کی جا سکے۔
ترجمان محکمہ داخلہ پنجاب توصیف صبیح گوندل کے مطابق، لاہور میں آرمی اور رینجرز کی ایک، ایک کمپنی جبکہ راولپنڈی
میں تین، تین کمپنیاں سکیورٹی کے لیے تعینات کی جائیں گی۔ اس کے علاوہ، آرمی ایوی ایشن کے ہیلی کاپٹرز بھی لاہور میں دستیاب رہیں گے۔
فوج اور رینجرز کی تعیناتی آئین کے آرٹیکل 245 اور پاکستان رینجرز آرڈیننس 1959 کے تحت عمل میں لائی جائے گی۔
ترجمان نے مزید بتایا کہ سہ ملکی کرکٹ سیریز کے میچز 11 نومبر سے 27 نومبر تک لاہور اور راولپنڈی میں شیڈول ہیں۔ ٹیموں
کی نقل و حرکت کو مدنظر رکھتے ہوئے 8 نومبر سے 30 نومبر تک سکیورٹی فورسز کی خدمات حاصل کی جائیں گی۔
محکمہ داخلہ پنجاب کے مطابق، میچز، ٹیموں کے قیام اور سفر کے دوران فول پروف سکیورٹی فراہم کی جائے گی، جبکہ وفاقی
وزارت داخلہ کو فوج اور رینجرز کی تعیناتی کے لیے باضابطہ مراسلہ بھیج دیا گیا ہے۔
تمام متعلقہ اداروں کو ہدایت کی گئی ہے کہ وہ ٹیموں کی سکیورٹی اور انتظامات بروقت مکمل کریں تاکہ سیریز بخیروخوبی منعقد ہو سکے۔
