شاہین اقبال طاہر
تحصیل رپورٹر، شاہکوٹ
ایس این این اردو
پنجاب حکومت کی جانب سے عوام کو صاف ستھرا ماحول اور معیاری تفریحی سہولیات فراہم کرنے کے دعوے شاہکوٹ میں بری
طرح ناکام نظر آتے ہیں۔ وزیراعلیٰ پنجاب کی جانب سے پبلک پارکس کی بحالی اور صفائی ستھرائی سے متعلق واضح احکامات
کے باوجود شاہکوٹ کا ہل پارک انتظامیہ کی مجرمانہ غفلت اور عدم توجہی کا شکار بنا ہوا ہے۔
ذرائع کے مطابق نامعلوم وجوہات کی بنا پر ہل پارک کو مکمل طور پر نظرانداز کر دیا گیا ہے، جس کے باعث پارک کے اندر جگہ
جگہ کوڑا کرکٹ کے ڈھیر لگ چکے ہیں۔ انتہائی تشویشناک امر یہ ہے کہ وزیراعلیٰ پنجاب کے فلیگ شپ منصوبے “ستھرا
پنجاب” کے تحت اسی تفریحی پارک میں باقاعدہ کوڑا پوائنٹ قائم کر دیا گیا ہے، جو حکومتی دعوؤں اور عملی اقدامات کے
درمیان واضح تضاد کو ظاہر کرتا ہے۔
پارک میں پھیلی گندگی، تعفن اور بدانتظامی نے شہریوں، بچوں اور فیملیز کے لیے اس تفریح گاہ کو ناقابلِ استعمال بنا دیا ہے۔
شہریوں کا کہنا ہے کہ اگر فوری طور پر اصلاحی اقدامات نہ کیے گئے تو ہل پارک بیماریوں اور ماحولیاتی آلودگی کا مستقل مرکز بن سکتا ہے۔
عوامی، سماجی اور صحافتی حلقوں نے وزیراعلیٰ پنجاب، چیف سیکرٹری اور دیگر متعلقہ اعلیٰ حکام سے مطالبہ کیا ہے کہ ہل
پارک کی بگڑتی ہوئی صورتحال کا فوری نوٹس لیا جائے، ذمہ دار افسران کا تعین کر کے ان کے خلاف سخت کارروائی کی جائے اور
پارک کو عوام کے لیے دوبارہ صاف، محفوظ اور فعال بنایا جائے۔
