اسلام آباد: (اختر خان،
نمائندہ خصوصی پاکستان)
جوڈیشل کمیشن آف پاکستان کے ایک اہم اجلاس میں اسلام آباد ہائیکورٹ کے تین ایڈیشنل ججز کی مستقل تقرری کی سفارش
کر دی گئی، جبکہ بلوچستان ہائیکورٹ کے جج جسٹس نجم الدین مینگل کی بطور مستقل جج تقرری کی بھی توثیق کر دی گئی۔
یہ اجلاس چیف جسٹس یحییٰ آفریدی کی زیر صدارت اسلام آباد میں منعقد ہوا، جس میں جوڈیشل کمیشن کے تمام ارکان نے
شرکت کی۔ اجلاس کے اعلامیے کے مطابق اسلام آباد ہائیکورٹ کے جسٹس محمد اعظم خان، جسٹس محمد آصف اور جسٹس
انعام امین منہاس کو مستقل جج مقرر کرنے کی منظوری دے دی گئی ہے۔
اعلامیے میں مزید بتایا گیا کہ بلوچستان ہائیکورٹ کے جج جسٹس نجم الدین مینگل کی مستقل تقرری کی توثیق کر دی گئی،
تاہم جسٹس ایوب خان کی توثیق کی سفارش اکثریتی رائے سے مسترد کر دی گئی۔
اجلاس میں آئینی بینچز کے لیے ججز کی نامزدگی کے معیار پر غور کے لیے ایک خصوصی کمیٹی تشکیل دی گئی ہے، جو ججز کی
تقرری، انٹرویوز، طریقہ کار اور قواعد میں ممکنہ ترامیم سے متعلق سفارشات مرتب کرے گی۔
جوڈیشل کمیشن نے جوڈیشل کمیشن قواعد 2024 میں ترامیم پر بھی غور کرنے کا فیصلہ کیا، جبکہ شفاف، مؤثر اور آئینی
تقاضوں کے مطابق عدالتی تقرریوں کے نظام کو مضبوط بنانے پر زور دیا گیا۔
مزید تفصیلات کے لیے جوڈیشل کمیشن آف پاکستان کے سابقہ فیصلوں سے متعلق ہماری رپورٹ بھی پڑھیں۔
