شمائلہ اسلم
اسکینڈے نیوین نیوز ایجنسی
بیورو چیف پاکستان
راولپنڈی میں کاؤنٹر ٹیررازم ڈیپارٹمنٹ (سی ٹی ڈی) اور انٹیلی جنس
ایجنسیوں نے مشترکہ کارروائی کرتے ہوئے فتنہ الخوارج سے تعلق رکھنے
والے ایک خطرناک دہشت گرد کو گرفتار کر لیا۔
گرفتار ملزم موسیٰ نے راولپنڈی کے حساس مقامات کی مکمل ریکی کی تھی اور
دہشت گردانہ حملوں کی منصوبہ بندی کر رہا تھا۔ اس نے ان مقامات کی
ویڈیوز بنا کر سوشل میڈیا پر بھی شیئر کیں۔
ترجمان سی ٹی ڈی کے مطابق، موسیٰ افغانستان سے متعدد بار ٹریننگ حاصل
کر چکا ہے اور خوارج گروپ کے ایک اہم کمانڈر سے رابطے میں تھا۔
کارروائی کے دوران اس کے قبضے سے ہینڈ گرنیڈز، 7 فٹ لمبی سیفٹی فیوز
وائر، تین ڈیٹونیٹرز، ریموٹ بٹن، پرائما کارڈ اور گولیاں برآمد ہوئیں۔
ملزم کے خلاف مقدمہ درج کر لیا گیا ہے اور اس کے نیٹ ورک کو بے
نقاب کرنے کے لیے تفتیش جاری ہے۔
