شمائلہ اسلم

اسکینڈے نیوین نیوز ایجنسی

بیورو چیف پاکستان

بلوچستان نیشنل پارٹی (بی این پی) کے سربراہ سردار اختر مینگل کو اتوار کے

روز دبئی جانے والی پرواز سے اس وقت آف لوڈ کر دیا گیا جب یہ انکشاف

ہوا کہ ان کا نام پروویژنل نیشنل آئیڈینٹیفیکیشن لسٹ (PNIL) میں شامل ہے۔

سردار اختر مینگل نے اپنے ایکس (سابقہ ٹوئٹر) ہینڈل پر بتایا کہ وہ کوئٹہ سے دبئی

جا رہے تھے جب امیگریشن حکام نے انہیں طیارے سے اتار دیا۔ ان

کے مطابق، انہیں آگاہ کیا گیا کہ ان کا نام پی این آئی ایل میں شامل کر دیا گیا

ہے جس کے باعث وہ بیرون ملک سفر نہیں کر سکتے۔

اس واقعے پر مختلف حلقوں کی جانب سے شدید ردعمل سامنے آیا۔ سینیٹر

ثناء اللہ بلوچ نے کہا:
“ہم سردار اختر جان مینگل، رکن قومی اسمبلی اور سابق وزیر اعلیٰ بلوچستان پر

عائد کی گئی من مانی اور سیاسی بنیادوں پر لگائی گئی پابندی کی شدید مذمت

کرتے ہیں۔ امیگریشن حکام نے انہیں کوئٹہ ایئرپورٹ پر دبئی جانے والی

پرواز سے اتار دیا، جو کہ افسوسناک اور غیر آئینی اقدام ہے۔”

انہوں نے مزید کہا، “سردار مینگل کے مطابق، انہیں بتایا گیا کہ ان کا نام

پروویژنل نیشنل آئیڈینٹیفیکیشن لسٹ (PNIL) میں شامل کر دیا گیا ہے — یہ

ایک انتہائی خطرناک عمل ہے جو آئین پاکستان کے آرٹیکل 15 کے تحت

حاصل آزادیِ نقل و حرکت کے حق کی کھلی خلاف ورزی ہے۔ ایسے

اقدامات نہ صرف قانون اور جمہوری اقدار کی روح کے منافی ہیں بلکہ شہری

آزادیوں کے بتدریج خاتمے کی علامت بھی ہیں۔”