شمائلہ اسلم
اسکینڈے نیوین نیوز ایجنسی
بیورو چیف پاکستان
لاہور: پاکستان کی انڈر-16 مردوں کی والی بال ٹیم نے ایشین انڈر-16 والی
بال چیمپئن شپ 2025 کے فائنل میں رسائی حاصل کر لی ہے، جہاں اس
کا مقابلہ اب ایران سے ہو گا۔ سیمی فائنل میں پاکستان نے اپنے روایتی
حریف بھارت کو 0-3 سے شکست دے کر میدان مار لیا۔ اسٹریٹ
سیٹس میں فتح کے اسکور تھے: 25-16، 25-19 اور 25-12۔
میچ کے آغاز سے ہی پاکستان نے جارحانہ حکمت عملی، بہترین ہم آہنگی اور
دفاعی مہارت کا بھرپور مظاہرہ کیا۔ جنید، فیضان، عرفان اور طلہ نے نمایاں
کارکردگی دکھائی، جنہوں نے دفاع اور حملے دونوں محاذوں پر ٹیم کی قیادت کی۔
ہیڈ کوچ کفایت اللہ نے فتح پر اظہارِ خیال کرتے ہوئے کہا، “یہ صرف جیت
نہیں بلکہ ایک پیغام تھا۔ لڑکوں نے جس جذبے اور ہم آہنگی سے کھیلا، وہ
قابلِ تعریف ہے۔ بھارت جیسی ٹیم کے خلاف اس سطح پر جیت ٹیم کا حوصلہ بڑھانے والی ہے۔”
اب پاکستان آج (19 جولائی، ہفتہ) شام 3:30 بجے PST پر فائنل میں
ایران کے خلاف میدان میں اترے گا۔ اس اہم مقابلے کو چیمپئن شپ کی
دو مضبوط ٹیموں کے درمیان سخت ٹکر تصور کیا جا رہا ہے۔
پاکستان کی شاندار کارکردگی کے باعث ٹیم نے فائیو بی انڈر-17 ورلڈ چیمپئن
شپ 2026 کے لیے بھی کوالیفائی کر لیا ہے، جو بین الاقوامی سطح پر ایک
بڑی کامیابی سمجھی جا رہی ہے۔
پاکستان والی بال فیڈریشن نے ٹیم کے نظم و ضبط اور کامیابی کو سراہتے
ہوئے مداحوں، سپانسرز اور تمام تعاون کرنے والوں کا شکریہ ادا کیا جنہوں
نے اس سفر میں ٹیم کا بھرپور ساتھ دیا۔
