شمائلہ اسلم
اسکینڈی نیوین نیوز ایجنسی
بیورو چیف پاکستان
اسلام آباد: پاکستان اور چین نے زرعی شعبے میں باہمی تعاون کو مزید فروغ
دینے پر اتفاق کیا ہے، جس میں خاص توجہ کپاس کی پیداوار، بیجوں کی تیاری،
آبپاشی ٹیکنالوجی اور تحقیقی تبادلے پر مرکوز رہے گی۔
وفاقی وزیر برائے قومی غذائی تحفظ، رانا تنویر حسین نے اسلام آباد میں چینی
وفد سے اعلیٰ سطحی اجلاس میں شرکت کی۔ ملاقات کے دوران دونوں
ممالک نے زرعی شعبے میں مل کر تحقیق، پائلٹ منصوبے اور ٹیکنالوجی کی
منتقلی کے لیے تکنیکی ورکنگ گروپس قائم کرنے پر اتفاق کیا۔
اجلاس میں خاص طور پر اس بات پر زور دیا گیا کہ پاکستان کے مختلف
ماحولیاتی خطوں کی ضروریات کو مدنظر رکھتے ہوئے باہمی اقدامات کیے
جائیں۔ اس ضمن میں گلگت بلتستان اور چین کے علاقے سنکیانگ کے
درمیان مشترکہ منصوبے شروع کرنے کی سفارش کی گئی، کیونکہ دونوں
خطوں میں جغرافیائی مماثلت پائی جاتی ہے۔
یہ اشتراک نہ صرف زرعی پیداوار میں بہتری لائے گا بلکہ مقامی کسانوں کو
جدید چینی ٹیکنالوجی تک رسائی بھی فراہم کرے گا، جس سے مجموعی زرعی
معیشت میں استحکام اور ترقی ممکن ہو سکے گی۔
