اسامہ زاہد

بیورو چیف – ساؤتھ ایسٹ ایشیا

ایس این این اردو

اسلام آباد – پاکستان کے معروف پراپرٹی ٹائیکون ملک ریاض کی ہاؤسنگ سوسائٹی بحریہ ٹاؤن کے اہم اثاثوں کی نیلامی آج (جمعرات، 7 اگست) کو ہونے جا رہی ہے۔ نیلامی کا عمل نیب راولپنڈی کے دفتر میں، واقع اسلام آباد کے سیکٹر G-6/1 میں منعقد کیا جا رہا ہے۔

سپریم کورٹ میں نیلامی روکنے کی درخواست

بحریہ ٹاؤن کی جانب سے بدھ کے روز سپریم کورٹ میں ایک درخواست دائر کی گئی ہے جس میں اسلام آباد ہائی کورٹ کے فیصلے کو چیلنج کیا گیا ہے، جس نے نیب کو نیلامی کی اجازت دی تھی۔

درخواست گزار کی نمائندگی سینیٹر فاروق ایچ نائیک نے کی، جنہوں نے مؤقف اختیار کیا کہ:

“اسلام آباد ہائی کورٹ کا فیصلہ کالعدم قرار دیا جائے اور اپیل پر فیصلے تک نیلامی کا عمل معطل کیا جائے۔”

نیلامی کی تفصیلات:

نیب کے مطابق آج نیلام ہونے والے اثاثوں میں شامل ہیں:

• بحریہ ٹاؤن فیز 2 راولپنڈی میں پلاٹ D-7 پر واقع کارپوریٹ آفس
• پلاٹ E-7 پر واقع دوسرا کارپوریٹ آفس
• روبائش مارکی اور لان
• بحریہ گارڈن سٹی گالف کورس کے قریب جائیدادیں
• بحریہ ٹاؤن اسلام آباد کی متعدد املاک

عوامی تشویش اور رہائشیوں کے تحفظات:

بحریہ ٹاؤن کے لاکھوں رہائشی اس صورتحال پر شدید تشویش کا اظہار کر رہے ہیں۔ رہائشی سبحان جنجوعہ نے انڈپینڈنٹ اردو سے بات کرتے ہوئے کہا:

“یہ عمل عام شہریوں کے لیے بھی باعثِ تشویش ہے۔ اگر کسی کی جائیداد یوں نیلام کی جائے، چاہے وہ ملک ریاض ہوں یا کوئی اور، تو یہ زیادتی ہے۔”

ملک ریاض پر مبینہ دباؤ؟

رپورٹس میں یہ بھی کہا جا رہا ہے کہ ملک ریاض پر دباؤ ڈالا جا رہا ہے تاکہ وہ 190 ملین پاؤنڈ ریفرنس میں عمران خان کے خلاف وعدہ معاف گواہ بن جائیں۔

ملک ریاض اس وقت دبئی میں مقیم ہیں اور انہیں پاکستان کی امیر ترین اور بااثر کاروباری شخصیات میں شمار کیا جاتا ہے۔